Dc Daqarro achukizwa na kasi hafifu ya ukamilishaji wa barabara za TARURA jijini Arusha

Posted on: July 11th, 2019

Mkuu wa wilaya ya Arusha Mhe. Gabriel Daqarro amemwagiza mhandisi Christopher Ngowi kutoka kampuni ya Ravji Construction Ltd kuwa ifikapo tarehe 14/08/2019 ujenzi wa barabara za Serengeti, Leyora na Machame  zenye thamani ya shilingi 768,883,500 zinazosimamiwa na wakala wa barabara za mijini na vijijini  (TARURA)  jijini Arusha  ziwe zimekamilika ili zianze kutumika.

Pichani: Barabara ya Meidimu - Nadosoito baada ya kukamilika kwa matengenezo ya sehemu korofi

**********************************************************

Ametoa agizo hilo wakati wa ziara yake aliyoifanya mapema leo hii kukagua maendeleo ya ujenzi wa barabara hizo ulioanza tarehe 14/01/2019.

Dc Daqarro amesema kuwa  kasi ya ukamilishaji wa ujenzi wa barabara hizo hairidishi kwani mpaka sasa mkandarasi hajafikisha   asilimia hamsini  ya ujenzi wa barabara hizo licha ya kuwa amebakiza wiki nne tu kati ya  muda wa miezi nane aliyopewa  kukamilisha barabara hizo.

Pichani: Maendeleo ya ujenzi wa barabara ya Sanawari inayotarajiwa kukamilika kwa kiwango cha lami

*******************************************

“Ifikapo tarehe 14/08/2019 tunataka tuone lami inateleza ili wananchi wetu waweze kufurahia ahadi wanazopewa na serikali ya awamu ya tano chini ya Rais Dkt. John Pombe Magufuli, kushindwa kufanya hivyo tutakuwajibisha” alisema Dc Daqarro

Katika ziara hiyo pia Dc Daqarro alipata fursa ya kutembelea na kukagua ujenzi wa barabara ya Sanawari, daraja (box culvet) katika mto  kwenye barabara ya Oljoro- Murriet, matengenezo ya sehemu korofi na ujenzi wa kalvati kwenye  barabara za Meidimu, Murriet – Nadosoito na Lolovono pamoja na barabara ya Sojema-Amani.