Dr. Madeni awaibukia wafanyabiashara wanaokimbia vibanda vyao masokoni na kuendesha biashara nje ya Masoko Jijini Arusha

Posted on: November 10th, 2018

Katika muendelezo wa operesheni ya ukusanyaji wa mapato Mkurugenzi wa Halmashauri ya Jiji la Arusha  Dr. Maulid Suleiman Madeni amefanya ziara ya kushtukiza katika Soko Kuu lililopo Jijini Arusha   ambapo amewatembelea wafanyabiashara walioacha vibanda vyao ndani ya soko na kukimbilia nje kwa kisingizio cha kujifananisha na wamachinga.

Katika ziara yake hiyo aliyoifanya leo Tarehe 10/11/2018 Dr. Madeni amewakumbusha wafanyabiashara  hao  wajibu wao wa kulipa kodi ya serikali na ushuru wa vibanda  kwani kwa kukimbia vibanda walivyotengewa kunaikosesha serikali mapato na kusababisha uharibifu mkubwa wa mazingira.

(Pichani: baadhi ya biashara zinazoendeshwa kiholela nje ya Soko Kuu lililopo Jijini  Arusha)

Pia  amewataka wafanyabiashara hao  ndani ya siku mbili wawe wamesharudi katika nafasi zao rasmi  za awali kwani ndani ya soko idadi ya vibanda vilivyo wazi ni kubwa  na kwa watakaokosa nafasi  waonane na Afisa Bashara wa Jiji Bw. Godfrey Edward  ili waweze kupangiwa maeneo mengine  yaliyotengwa  kwa ajili ya wafanyabiashara.

“Kwa kupanga bishara zenu kiholela mnasababisha kuzuia njia za waenda kwa miguu na sehemu za wateja kupaki vyombo vyao vya usafiri  kitendo kinachosababisha usumbufu na ukosekanaji wa mapato hivyo niwaombe mrudi katika nafasi zenu za awali ili kuuweka mji wetu katika hali ya usafi” Alisema Dkt. Madeni

“Tunaelekea katika msimu wa mvua nyingi, tusipouweka mji wetu katika hali ya usafi na kuacha kuzuia biashara zinazipangwa kiholela basi tutayakaribisha majanga makubwa ya mlipuko wa magonjwa na uharibifu wa miundombinu kwani uchafu unaweza kuwa chanzo kikuu cha mifereji kuziba ” aliongeza  Mkurugenzi huyo

Zoezi la kuwarudisha wafanyabiasha waliokimbia maeneo yao na kuvamia katikati ya Mji kiholela ni endelevu na Mkurugenzi Mkurugenzi wa Halmashauri ya Jiji la Arusha  Dr. Maulid Suleiman Madeni  ataambatana na timu yake  ya watumishi wa idara mbalimbali kuhakikisha wafanyabisahara wote wanapatiwa maeneo rasmi na kuuacha mji wa Arusha katika hali ya usafi kwani Jiji la Arusha ndio kitovu kikuu cha utalii.