JIJI LA ARUSHA LATIA FORA UGAWAJI WA MIKOPO, LAMWAGA ZAIDI YA BILIONI 2 ZA MIKOPO KWA WANAWAKE, VIJANA NA WATU WENYE ULEMAVU.

Posted on: March 22nd, 2023

Na Mwandishi Wetu. 

Arusha Jiji. 

Mkuu wa Wilaya ya Arusha Mhe. Felician Mtahengerwa,amepongeza jitihada za Jiji la Arusha kuhakikisha makundi hayo yanawezeshwa na kujikwamua kiuchumi na haijawahi  kutokea Halmashauri kutoa kiasi kikubwa cha fedha namna hiyo.

Amesema kuwa, mikopo hiyo ina nia njema ya kuwakomboa wananchi wake kutoka kwenye hali duni zaidi ili waweze kufanya biashara na kujikwamua kiuchumi.

"Nawaomba sana mkafanye biashara zenye ubunifu ili muweze kurejesha kwa wakati na wenzenu wengine waweze kupata na hata kuiga mfano kutoka kwenu kwani itawasaidia  kutoka sehemu moja kwenda nyingine" amesema Mtahengerwa. 

Naye Mstahiki Meya wa Jiji la Arusha Mhe. Maximilian Matle Iraqhe amesema kuwa kwa mara ya kwanza Jiji la Arusha limevunja  rekodi ya kutoa pesa nyingi kupitia mapato ya fedha za ndani .

Amesema kuwa Jiji  la Arusha makisio ya ukusanyaji wa mapato yameongezeka kutoka  Tsh. 30.5 bilioni kwa mwaka wa fedha 2022/2023  hadi kufikia Tsh. 60.6 bilioni kwa mwaka 2023/2024 sawa  na  ongezeko la asilimia 100 .

"Kupitia fedha hizi  zilizotolewa leo tunatarajia  kuwa na jiji la Arusha litabadilika na vijana kuweza kujikwamua kiuchumi kwa kujihusisha na shughuli mbalimbali na hatimaye kuweza kutengeneza ajira kwa vijana wengine."amesema Iraghe.

Kaimu Mkurugenzi Jiji la Arusha Bw. Hargeney Chitukuro  amesema kuwa,Halmashauri hiyo  imekabidhi hundi  ya Shilingi 2.6 bilioni kwa vikundi 169  vya wanawake ,vijana na watu wenye walemavu. 

Amesema kuwa jumla ya vikundi 205 viliwasilisha maombi yao kwenye mfumo wa TPL-MIS, ambapo uhakiki ulifanyika na kubaini  kuwa vikundi 7 vimejikita katika shughuli zenye mwelekeo wa  uzalishaji kupitia vikundi vidogovidogo na usindikaji.

Aidha amesema kuwa, vikundi 28 vinafanya miradi ya uzafirishaji ,77 vinajihusisha na miradi ya kilimo na ufugaji,na vikundi 93 vinajihusisha na biashara na ujasiriamali ambapo katika hivyo vikundi 169 ndivyo  vilivyokidhi  vigezo.

Aidha amesema kuwa, Halmashauri ya Jiji la Arusha kuanzia julai  hadi sasa hivi walishatoa kiasi cha shs 3. 9 bilioni  kwa vikundi 339 hadi sasa hivi ambapo zimewawezesha kutengeneza  ajira mbalimbali kwa makundi hayo. 

Amesema kuwa,kati ya vikundi hivyo jumla ya vikundi 127 ni vya wanawake,huku vikundi vya vijana vikiwa 32,na watu wenye ulemavu vikiwa 10 .

"Haijawahi kutokea  Jiji la Arusha kutoa mikopo ya fedha nyingi hivi,hivyo tunawaomba  sana mnaopatiwa  mikopo  hii leo mkawe  warejeshaji  wazuri na mkarejeshe  kwa wakati  ili na wenzenu waweze kunufaika kupitia  mikopo  hiyo na kujikwamua  kiuchumi."amesema .

#arusha #tanzania #KaziIendelee