Maafisa waandikishaji wasaidizi wa daftari la kudumu la wapiga kura ngazi ya kata, jimbo la Arusha Mjini wapatiwa mafunzo

Posted on: July 12th, 2019

Kuelekea katika zoezi la uboreshaji wa  Daftari la Kudumu la Wapiga Kura, linalofanywa na Tume ya Taifa ya Uchaguzi (NEC) Halmashauri ya jiji la  Arusha kupitia Jimbo la Uchaguzi la Arusha Mjini, wameanza rasmi mchakato wa uboreshaji wa Daftari hilo kwa kutoa Mafunzo kwa Maafisa Waandikishaji wasaidizi ngazi ya Kata.

Akizungumza wakati wa kufungua mafunzo hayo, Afisa Mwandikishaji Jimbo la Arusha Mjini Dkt. Maulid Suleiman Madeni, amewataka Maafisa Waandikishaji hao wa  ngazi ya kata kufuatilia kwa umakini mafunzo hayo yanayotolewa na Tume ya Taifa ya Uchaguzi ili kuweza kusimamia zoezi hilo kwa umakini na uadilifu ndani ya kata zao.

Dkt. Madeni amesisitiza kuwepo kwa ushirikiano kati ya watendaji wote wa zoezi hilo, serikali, vyama vya siasa na wadau wengine  pamoja na kutosita kuomba ufafanuzi au maelekezo katika kazi zao.

Naye Afisa Uchaguzi wa  Halmashauri ya jiji la  Arusha Bi. Namnyaki Laitetei ameeleza kuwa zoezi hilo linategemea kufanyika kwa muda wa siku 7 tu, kuanzia tarehe 18 -24 Julai, 2019 katika kata 25 za Jimbo la Arusha mjini kukiwa na jumla ya vituo 185 vya kujiandikishia.