Mganga Mkuu Jiji la Arusha afungia Clinic ya IVF, ang’oa mabango ya matangazo ya utoaji wa huduma zinazoendeshwa katika kituo hicho kinyume na sheria

Posted on: November 22nd, 2018

Mganga Mkuu wa Halmashauri ya Jiji la Arusha Dkt. Simon Chacha leo Tarehe 22 Novemba,  2018 amefungia utoaji wa huduma katika clinic inayofahamika kwa jina la ARUSHA IVF AND FERTILITY CLINIC  inayoshughulika na huduma  ya upandikizaji wa mimba  kwa kina mama kilichopo maeneo ya Uzunguni kata ya Sekei Jijini Arusha.

Dkt. Chacha amechukua hatua hiyo mara baada ya mmiliki wa kituo hicho Dkt.Sally  Kukaidi amri ya kutoa mabango yake ya matangazo na kuendelea kutoa huduma kinyume na sheria kwani bado hajakamilisha taratibu za usajili wa  kituo hicho kutoka Wizara ya Afya kabla ya huduma kuanza kutolewa ambapo kimekuwa kikitoa huduma kwa takriban miaka miwili sasa.

• Pichani: Gari aina ya  NOAH lenye namba za usajili  T989 CGA ambalo limewekewa matangazo ya kituo hicho cha ARUSHA IVF AND FERTILITY CLINIC  

...............................................................................................................................

“Tumeamua kutoa haya mabango kwani mmiliki wa kituo hiki amekuwa akikaidi amri ya kuyatoa kama ambavyo mara kwa mara tumekuwa tukimwelekeza na kumtaka kufanya hivyo na amekuwa akisambaza mawasiliano ya kituo chicho kwa kutumia mabango haya pamoja gari aina ya  NOAH lenye namba za usajili  T989 CGA ambalo tumeshatoa taarifa kwa vyombo vya usalama barabarani endapo likionekana likamatwe mara moja ” alisema Mganga Mkuu huyo.

• Pichani: Mafundi wakiwa katika zoezi la kuondoa bango kubwa la matangazo lililopo katika eneo la utawala/mapekezi ya kituo hicho.

..........................................................................................................

Aidha Dkt. Chacha ameongeza kwa kusema kuwa mmiliki wa kituo hicho anaishi Nchini Uganda na anafanyia kazi zake Dar es salaam hivyo amekuwa akiacha mtu katika clinic hiyo ambaye amekuwa akiwasiliana na wateja moja kwa moja kisha ndio afunge safari kuja kutoa huduma Jijini Arusha na kwa sasa hatua za usajili wa kituo hicho zimesitishwa mpaka pale itakapoamuliwa vinginevyo.