Watoto 104,986 wapatiwa dawa za kinga tiba ya Kichocho na Minyoo Jijini Arusha

Posted on: May 4th, 2019

Jumla ya watoto 104,986 wenye umri wa  miaka 5 hadi 14 wa halmashauri ya jiji la  Arusha, wamepatiwa  dawa za kinga tiba ya ugonjwa wa Kichocho na minyoo ya tumbo. magonjwa yanayofahamika kama magonjwa yasiyopewa  kipaumbele 'Neglected Tropical Disease (NTD'.

Zoezi la ugawaji wa dawa hizo lilianza tarehe 2-3/05/2019 katika vituo 154  vilivyoko kwenye shule za msingi za serikali na za binafsi.

Akizungumza wakati wa zoezi hilo  Mganga Mkuu wa  halmashauri ya jiji la Arusha, Dkt. Simon chacha  amesema kuwa zoezi hilo la kitaifa lilianza na kumalizika salama katika vituo vyote vya kutolea huduma na changamoto ndogondogo zilizojitokeza wakati wa zoezi la utoaji dawa ni baadhi ya wazazi kutotoa ushirikiano wakutosha kwa walimu huku wengi wao kutokuwa na elimu ya kutosha kuhusu kingatiba  licha ya kuwa elimu imekuwa ikitolewa mara kwa mara na uongozi wa Halmashauri.

Naye Mratibu wa Kinga Tiba jiji la Bi. Monica Ngonyani, Arusha ameeleza  kuwa kutokana na ongezeko la tatizo la magonjwa ya kichocho na minyoo kwa watoto ambayo husababisha upungufu wa damu, utumbo kutoboka na hata kifo,  Serikali imeamua kutoa huduma hiyo ya  kinga tiba bure nchi nzima.

Ameendelea kwa kusema kua ugonjwa wa kichocho ni tatizo kubwa kwa watoto na usipopata tiba kwa haraka  husabisha madhara na wakati mwingine vifo, hivyo ni vema wazazi kuchukua tahadhari kwa kuwapa watoto dawa hizo pindi serikali inapoendesha zoezi la kuwapatia watoto dawa za kinga tiba.

Aidha amewataka wazazi na walezi kuhakikisha watoto wao, wanapata kinga tiba hizo muhimu na  kuwaondoa hofu wale wanaodhani dawa hizo zina madhara kwa watoto.

*Pichani:  Moja ya wanafunzi wa  shule ya Msingi Upendo friends iliyopo kata ya Olmoti Jijini Arusha akimeza dawa wakati wa zoezi la kutoa kinga tiba hizo*