Zaidi ya Milioni 600 kutekeleza ujenzi wa miundombinu ya elimu Jijini Arusha

Posted on: April 29th, 2023

Na Mwandishi Wetu 

Arusha

Mkoa wa Arusha umepata fedha  Kiasi cha shilingi Bilioni 1. 372  kwa ajili ya ujenzi wa miundombinu ya shule ikiwemo vyumba vya madarasa, ujenzi wa vyoo  na mabweni 4 katika Shule ya sekondari Arusha girls iliyopo katika Halmashauri ya Jiji la Arusha na Shule ya Sekondari ya Florian iliyopo Wilayani karatu. 

Akizungumza katika hafla ya Kusainisha  mikataba ya kusimamia ujenzi huo iliyofanyika mapema leo Aprili 29,2023, Mkuu wa Mkoa wa Arusha Mhe. John Mongela Amesema mkoa wameamua kusainishana mikataba ya ujenzi huo na wahusika wakuu ambao ni mkuu wa wilaya ya karatu , Mkurugenzi wa Jiji la Arusha na wakuu  wa shule hizo. 

Mhe. Mongella amesema  kazi za ujenzi wa shule hizo zinatakiwa kukamilika ndani ya siku 90  na vigezo vyote vinavyohitajika kwenye ubora wa majengo vimeainishwa kwenye mkataba huo .

"Rais wetu Mhe. Dkt Samia Suluhu Hassan anaendelea kuleta fedha kwa ajili ya kuimarisha sekta ya hii nyeti ya elimu na mnajua kwenye mkoa wetu tulishapokea Awali  Bilioni 6.8 Mpango  wa Boost Sasa tumepata kwenye sekondari hizi  mbili kwa msimu huu " alisema Mongella. 

Pia amewataka wakuu wa shule hizo kutumia vizuri fedha walizopatiwa na kufuata maelekezo yaliyotolewa ya Ujenzi wa shule zenye  viwango bora na ujenzi wa uhakika kwakuwa fedha walizopatiwa zinatosheleza mahitaji ya ujenzi hadi kukamilika. 

Naye Kaimu Mkurugenzi wa Jiji  la Arusha Hargney Chitukuro amesema wapokea Kiasi Cha fedha shilingi milioni 679.1  kwa ajili ya ujenzi wa madarasa 15, mabweni 2 na matundu ya vyoo  21 kwenye Shule ya Arusha Girls sekondari. 

"Nitakwenda kusimamia kwa kushirikiana na wenzangu kuhakikisha kwamba fedha Hizi zinakamilisha ujenzi wa miundombinu hii niliyoisema Kama ambavyo imepangwa nasio vinginevyo na tutaikamilisha kwa ubora na Kwa wakati "amesema Chitukuro. 

Aidha Chitukuro ameishukuru  Serikali kwa kiasi hicho cha fedha walichokipata kwakua msimu watakao ripoti  wanafunzi wa kidato cha tano mwezi Julai mwaka huu watakuta miundombinu  bora Shuleni. 

Kwa upande wake Afisa Elimu wa Mkoa wa Arusha Mwl. Abeli Ntupwa  ameeleza kuwa fedha hizo zimelenga  kuandaa mazingira bora ya kuwapokea wanafunzi wa kidato cha tano ambao wanatarajiwa kuripoti Shule kwanzia mwezi Julai mwaka huu.