ZAIDI YA SHILINGI BILIONI 60 KUTEKELEZA MIRADI YA MAENDELEO 2023/2024 JIJINI ARUSHA

Posted on: March 3rd, 2023

Na Mwandishi Wetu 

Arusha 

Mstahiki Meya wa Jiji la Arusha Maximilian Iranqhe amesema kwa  mwaka wa fedha wa 2023/24 Halmashauri ya Jiji hilo imepitisha  bajeti ya kiasi cha shilingi bilioni 60.6 ambapo ni ongezeko mara mbili ya bajeti waliyokuwa nayo ya shilingi bilioni 30.5 kwa mwaka wa fedha 2022/2023 

Ameyasema hayo  wakati akizungumza na Waandishi  wa Habari mapema Leo ofisini kwake Jijini Arusha  na kusema kuwa  Kutokana na ukuaji wa biashara na mazingira wezeshi kwa wafanyabiashara  wa Jiji la Arusha makusanyo ya Halmashauri ya Jiji hilo  yamepanda kwa asilimia miamoja kutoka bilioni 30.5  hadi shilingi   bilioni 60.6. 

Meya Iranqhe amebainisha kuwa ongezeko hilo la mapato  limetokana   na jitihada kubwa zinazofanywa na wananchi wa Halmashauri ya Jiji la Arusha kwa kushirikiana na viongozi wao. 

Amesema katika bajeti hiyo ya shilingi bilioni 60.6 wameweka mikakati ya asilimia  80 ya fedha hizo kuwa  zitaenda kwenye miradi ya maendeleo badala ya asilimia 70 ya hapo  awali iliyokuwa ikienda kwenye miradi ya maendeleo ambapo bilioni 26.2  sawa  na asilimia hamsini  zikienda kwenye kundi la huduma za kiuchumi zinazo  changia kuingiza mapato katika halmashauri. 

Sambamba na hayo Mstahiki Meya amebainisha kuwa asilimia 50  ya bajeti hiyo ya shilingi bilioni 60.6 itaenda kwenye huduma za kijamii ikiwemo elimu na afya ili kutatua changamoto zilizopo na Watahakikisha shule zinakuwa bora na vituo vya huduma za afya zitakuwa na dawa za kutosha. 

Aidha, Mstahiki meya ameeleza kuwa halmashauri hiyo itawachukulia hatua wale wote watakao bainika kucheza na mapato ya halmashauri ya Jiji hilo.