WANAFUNZI wa shule ya Sekondari Arusha Girls katika Halmashauri ya Jiji la Arusha wametakiwa kutumia vyema Teknolojia ya Habari na Mawasiliano.

Posted on: July 15th, 2021

WANAFUNZI wa shule ya Sekondari Arusha Girls katika Halmashauri ya Jiji la Arusha wametakiwa kutumia vyema Teknolojia  ya Habari na Mawasiliano TEHAMA ili waweze kuendana na mabadiliko yanayotokana na kuendelea kukua kwa teknolojia hiyo. 

Kauli hiyo imetolewa na Kaimu Katibu Tawala wa Mkoa wa Arusha Emanuel Mahundo  wakati wa Makabidhiano ya msaada wa Kompyuta 25 zilizotolewa na Shirika la empower na KOICA. 

Bw. Emmanuel Mahundo alisema  kwamba elimu ya TEHAMA imekuwa chachu ya maendeleo kwani imekuwa ikirahisisha kazi ambapo aliwahimiza wanafunzi hao kutumia fursa hiyo ipasavyo iliwaletee manufaa katika maisha yao.

“Niwaombe  mtumie elimu ya TEHAMA hasa Teknolojia ya mitandao kwa mambo yaliyo mema na sio mabaya kwa kuwa mkiitumia vibaya mtaua ndoto zenu zakufanya vizuri na kuishi maisha bora hapo baadaye” alisema Mahundo

Kwa upande wake Kaimu Mkurugenzi wa Jiji la Arusha Ndg. Omary Kwesiga amewataka wanafunzi  hao  kutumia elimu  ya TEHAMA kwa kuongeza maarifa zaidi ya kujifunza.

Kwesiga  aliwataka kutunza vizuri vifaa hivyo ili vilete manufaa kwa wanafunzi waliopo na watakaokuja kujiunga katika shule hiyo  ya wanafunzi wa sasa na watakaokuja kujiunga katika shule hiyo baadae. 

Naye, Kaimu Afisa Elimu Jiji la Arusha, Ndg. Prosper Kessy amewashukuru wadau hao wa Kampuni ya empower na KOICA kwa msaada huo na kwamba kitendo hicho ni ishara kuwa wanajali na kutambua umuhimu wa elimu.