Dc Daqarro amtaka Mganga Mfawidhi kituo cha Afya Murriet kuhakikisha huduma za wazee zinapewa kipaumbele

Posted on: November 9th, 2018

Mkuu wa Wilaya ya Arusha Mjini Mhe. Gabriel Daqarro amemtaka Mganga Mfawidhi  wa Kituo cha afya Murriet, Bw. Mustafa Miraji Kuhakikisha huduma za wazee zinapewa kipaumbele ikiwemo kuwekewa dirisha lao maalum la dawa.

Dc Daqarro ametoa agizo hilo hapo jana wakati wa ziara yake katika kituo hicho   kukagua maandalizi ya matumizi ya kituo hicho  ambapo mpaka sasa ujenzi umekamilika kwa jengo la wagonjwa wa nje na liko tayari kutumiwa na  wananchi na huduma zimeanza kutolewa ikiwemo huduma ya mama na mtoto, huduma ya wagonjwa wa nje (opd), maabara, dawa na  chanjo.

Wakati wa ziara yake katika kituo hicho dc daqarro aliwapongeza watumishi wa afya katika Jiji la Arusha, Mhandisi wa Jiji na kila mmoja kwa nafasi yake katika kufanikisha kukamilikwa kwa ujenzi wa kituo cha Afya Murriet na kuwataka  watumishi katika kituo hicho  kufanya kazi kwa weledi na kujitoa kwa ajili ya wananchi na kudhibiti matumizi ya dawa.

Pia amemwaagiza Mganga Mkuu wa Jiji la Arusha, Dkt. Simon Chacha kuhakikisha Mfumo wa malipo wa serikali unaanza  kutumika mara moja ili kukwepa vitendo vya rushwa na ubadhilifu wa Fedha za serikali.

“Makatibu wa afya fuatilieni  madai na maslahi na madai  ya watumishi na pia hakikisheni mnaendesha  vikao vya mara kwa mara ili kubaini changamoto mbalimbali na kuongeza ufanisi wa kazi ” aliongeza Mkuu wa Wilaya huyo

Utolewaji wa huduma za afya katika kituo cha Murriet  utasaidia kutatua changamoto za huduma za afya kwa  wakazi wa kata ya Murriet na Jiji zima kwani utaimarisha hali ya utoaji wa huduma za afya na kupunguza msongamano katika hospitali na vituo vingine vya afya vilivyopo Jijini Arusha