Dc Daqarro, wanaofanya matukio ya ukatili dhidi ya watoto kukiona

Posted on: June 16th, 2019

Mkuu wa Wilaya ya Arusha Mh. Gabriel Daqarro ameviagiza vyombo vinavyoshughulikia haki na masuala ya watoto kuhakikisha matukio yote  ya ukatili dhidi ya watoto  yanaripotiwa katika vyombo vya dola  na kesi zote zifike  mahakamani ili wanaopatikana na hatia waweze kuhukumiwa.

 Mhe. Daqqaro ameyasema  hayo  mapema leo hii wakati wa maadhimisho ya Siku ya Mtoto wa Afrika yaliyofanyika Viwanja vya Arusha School iliyopo Jijini Arusha.

 Amesema kuwa  hatua kali za kisheria zichukuliwe dhidi ya wote wanaopatikana na hatia katika  matukio ya ukatili dhidi ya watoto na kama serikali wanaendelea kupeleka maombi katika ngazi za juu ikiwezekana dhamana isiwepo katika makosa hayo ili kupunguza au kutokomeza kabisa ukatili dhidi ya watoto.

“kuna matukio mengi ya kikatili dhidi ya watoto yanafanyika katika jamii ikiwemo watoto kubakwa na kulawitiwa lakini hatua hazichukuliwi, baadhi ya   wazazi  na walezi hawaripoti  matukio hayo na  wakati mwingine kusababisha kesi zisifike mahakani hivyo niviombe  vyombo vya dola  kusimama kidete kuhakikisha watoto wanapata haki zao” alisema Mhe. Daqarro

“Pia nichukue fursa hii kuwataka wazazi na walezi kuhakikisha mnawapa watoto ulinzi wa kutosha pamoja na kutimiza majukumu yenu  ikiwemo kufuatilia maendeleo yao pamoja na kuwapa elimu kwani serikali  ya awamu ya tano chini ya Rais Dkt. John Pombe Magufuli kila mwaka inatenga fedha kwa ajili ya kuhakikisha watoto wanapata  elimu bila malipo” aliongeza Mhe. Daqarro”

Naye  Mwakilishi wa Mkurugenzi wa Jiji la Arusha Ndg. Omary Kwesiga amesema wanafunzi wenye mahitaji maalum serikali inawajali kwa kuwatengea fedha ili waweze kujikimu katika maisha yao ya kila siku na waweze kufaulu masom yao  hivyo ni wajibu wa watoto kuhakikisha wanasoma kwa bidii ili waweze kutimiza ndoto zao ikiwemo kuhakikisha wanashrikishwa katika majukumu mbalimbali ili wawe viongozi bora hapo baadae.

Nao baadhi ya watoto, Ashura Juma na Issack Joseph wakati wakisoma Sera ya Watoto mbele ya mgeni rasmi  walisema ni vyema sasa sheria za watoto zitiliwe mkazo  ili wahalifu  wasipewe dhamana kwani inaumiza kuona baadhi ya matukio yanaishia polisi bila kwenda mahakamani.

Awali maadhimisho hayo yaliambatana na maandamano kutoka makao makuu ya  Jiji la Arusha hadi Arusha School pamoja na maonyesho mbalimbali ya kuibua vipaji vya watoto  katika kuinua uchumi wa viwanda.

Mtoto wa Afrika ni siku ya kuwaenzi watoto zaidi ya 500 waliopoteza maisha kwa kuuwawa kikatili huko mjini Soweto - South Afrika mnamo mwaka 1976

Kauli mbiu ya mwaka huu “MTOTO NI MSINGI WA TAIFA ENDELEVU; TUMTUNZE, TUMLINDE NA KUMUENDELEZA”