MAAFISA MAENDELEO JIJI LA ARUSHA WATAKIWA KUPINGA UKATILI

Posted on: March 16th, 2021

Maafisa Maendeleo Jiji la Arusha watakiwa kupinga Ukatili 

Na Mwandishi wetu

Maafisa  maendeleo wa Kata katika Halmashauri ya Jiji la Arusha wametakiwa kutumia nafasi zao vyema kwa kuhakikisha kuwa wanapinga  vitendo vya ukatili  wa kijinsia  katika kata wanazofanya kazi lengo ikiwa ni kujenga jamii bora ambayo  inatambua haki za binadamu  na kuzilinda.

 Kauli hiyo imetolewa na Mkurugenzi wa Halmashauri ya   Jiji la Arusha Dk.John Pima  wakati akifungua  mafunzo ya  maafisa wa maendeleo  kutoka kata 25 wa  Halmashauri hiyo    mafunzo yenye lengo la  kuwajengea uwezo  wa namna bora  kusaidia jamii  kupinga   ukatili wa kijinsia na  umuhimu wa Lishe bora kwa watoto.

Dk.Pima alisema kuwa maafisa maendeleo wanajukumu lakuhakikisha kuwa watoto hawatendewi ukatili wa kijinsia  katika jamii wanazofanyia kazi  kwa kuchukua hatua za kisheria kwa watu watakaobainika wanaonyanyasa watoto.

Pamoja na mambo mengine anawataka kuhakikisha wanaelimisha jamii kuhusu Lishe bora kwa watoto ikiwa ni kuwaepushia watoto magonjwa yanayoweza kutokea kutokana na kukosa lishe bora

Kwa upande wake Kaimu Afisa Maendeleo  ya Jamii Halmashauri ya Jiji la Arusha  Hanifa Ally alisema kuwa mafunzo hayo ya siku mbili kwa maafisa maendeleo kutoka kata 25 za Halmashauri ya Jiji la Arusha yana lengo la kuwakumbusha na kuwajengea uwezo maafisa hao juu ya Ukatili wa watoto na Lishe bora.

Bi  Hanifa  alisema  kuwa maafisa hao wanajukumu la kuhakikisha kuwa ukatili katika kata zao unakomeshwa  na kujenga jamii bora isiyokuwa na uonevu.

Anaongeza kuwa maafisa hao wanapaswa kuhimiza Lishe bora kwa watoto, kwa kuwa lishe bora ni matokeo ya ukuaji  bora wa watoto  na kwamba jamii inatakiwa kuelimishwa umuhimu wake na hatimaye kuweza kuwahudumia watoto  kwa  kuwapatia mlo kamili.

Hanifa  alisema  kuwa mafunzo hayo yanalengo la kuwajengea uwezo wa kukabiliana na changamoto za wananchi ikiwa ni pamoja na ukatili wa kijinsia  kwa kuhakikisha kuwa wahanga wa ukatili wanapata msaada wa kisheria pindi inapobainika kuna ukatili.

Mafunzo hayo yameandaliwa na  Halmashauri ya  Jiji la Arusha kupitia idara ya maendeleo ya Jamii ikiwa ni kuwajengea uwezo wa kusaidia jamii kupinga ukatili wa kijinsia na namna ya kuhimiza Lishe bora kwa watoto katika jamii.