Maambukizi ya VVU yaongezeka Jiji la Arusha kwa 2.8% kutoka mwaka 2020 hadi 3.1% mwaka 2021

Posted on: December 2nd, 2022

Na Mwandishi Wetu 

Arusha

Wilaya ya Arusha imeonyesha maambukizi ya ugonjwa wa UKIMWI kuongezeka kutoka asilimia 2.8 mwaka 2020 hadi asilimia 3.1 mwaka 2021.

Akizungumza katika maadhimisho ya siku ya UKIMWI  yanayofanyika Disemba Mosi kila mwaka, Mkuu wilaya ya Arusha Mhe. Said Mtanda amesema Wilaya ya Arusha wanalo jukumu la kuendeleza mipango mizuri ya kukabiliana na ongezeko la UKIMWI.

Pichani: Mkuu wa Wilaya ya Arusha Mhe. Said Mtanda akizungumza na Wananchi waliojitokeza katika Maadhimisho ya siku ya UKIMWI duniani,Disemba Mosi, 2022. 

"Kwa jamii na  watanzania wanaendelea kupima na kujua afya zao na pale tunapobaini afya zetu ni vyema tufuate utaratibu uliowekwa na serikali na wale ambao wanatumia dawa wito wetu watumie kadri walivyoelekezwa na wataalamu wa afya,"amesema Mtanda.

Aidha amewasisitiza wananchi wa Wilaya ya Arusha wanaotumia dawa kujiepusha na kueneza maambukizi kwa watu wengine kwa makusudi kwani kufanya hivyo ni kinyume na sheria.

Mwakilishi wa watu wanaoishi na VVU Wilaya ya Arusha,Caroline Chami amesema katika wilaya ya Arusha mafanikio yapo ya kupambana na ugonjwa huo ikiwa jitihada zote zinatokana na mshikamano na juhudi za serikali na wadau mbalimbali.

Naye Kaimu  Mkurugenzi wa Jiji la Arusha Bw. Hargney Chitukuro amesema kuwa wataendelea kutoa huduma za afya  na kuziboresha pamoja na kuzisogeza karibu na wananchi ili kila mwananchi aweze kufikiwa na huduma za afya.

"Kwani tunaona takwimu zinazotolewa za asilimia  1.9 ya maambukizi katika mkoa wetu,nina imani kwa huduma hizi zinazotolewa zitazidi kupungua,"amesema Chitukuro.

PICHANI: Kaimu Mkurugenzi wa Jiji la Arusha, Hargeney Chitukuro akitoa neno katika Maadhimisho ya siku ya UKIMWI duniani.

Sambamba na hilo Jiji la Arusha limetoa kadi za Bima  ya afya 100 katika kaya 20 ambazo hazina uwezo hivyo wataendelea kuangalia eneo hilo pamoja na kuwasaidia wengine.