MEYA IRANQHE ATAKA USAFI JIJINI ARUSHA UWE ENDELEVU

Posted on: January 28th, 2023

Na Mwandishi Wetu 

Arusha

Katika kuadhimisha miaka 46 ya kuzaliwa kwa Chama Cha Mapinduzi (CCM),Viongozi wa Jiji la Arusha  kwa kushirikiana na wanafunzi wa vyuo vya elimu wamefanya usafi katika soko la Kilombero na Stendi ndogo ya Jiji ambapo sasa usafi wa pamoja wa makundi mbalimbali utakuwa unafanyika kila Jumamosi. 

Mstahiki Meya wa Jiji la Arusha Mhe. Maximillian Iranqhe amesema katika kuadhimisha siku hiyo madiwani wa hilo wameweza kufanya usafi wa mazingira ili kuhamasisha wananchi kuendelea kuweka mazingira safi na salama kwa afya ya viumbe hai.

Aidha amesema kuwa ni takribani miezi sita hali ya Jiji hilo sio safi kutokana na kulegalega kwa usimamizi wa viongozi wa jiji hilo ikiwemo Mwenyeti wa kamati ya usafi na mazingira.

"Kuanzia leo na kuendelea zoezi hili la usafi liendelee ili kuonyesha mfano kwa wananchi Jiji likae safi,"amesema 

Isaya Doita ni mwenyekiti wa kamati ya huduma za jamii katika Halmashauri ya jiji la Arusha na ambaye pia ni Diwani wa Ngarenaro amewataka Maafisa afya wa Halmashauri ya Jiji hilo kusimamia zoezi kikamilifu ili liweze kuwa endelevu.

Nao wanafunzi wa vyuo  walioshiriki kufanya usafi wanatoa rai kwa wasomi na wananchi kuhakikisha mazingira yanakuwa safi ili kuepukana na magonjwa  ya mlipuko.