MKURUGENZI AKABIDHI MSAADA WA MIPIRA KWA TIMU YA AFC

Posted on: March 4th, 2021

Mkurugenzi akabidhi msaada wa mipira kwa Timu ya AFC .

Na Mwandishi wetu

MKURUGENZI wa Jiji la Arusha Dk.John Pima amekabidhi  mipira mitano kwa uongozi wa timu ya  mpira ya  Arusha Football Club ikiwa  jitihada za kuunga mkono michezo katika Halmashauri ya Jiji la Arusha mpira wa miguu ukiwa miongoni mwa michezo hiyo. 

Akikabidhi  mipira hiyo kwa kiongozi wa timu ya AFC kocha  Elly Kisanga  alisema kuwa michezo ni burudani, ajira na kwamba Jiji la Arusha limepania kuhakikisha michezo inaendelezwa ikiwa ni pamoja na kuibua vipaji vya wachezaji.

Dk. Pima alisema viongozi wa Jiji la Arusha ambao ni Mkuu wa Wilaya ya Arusha Mh.Kenan Kihongosi ,Meya wa Jiji la Arusha Maxmillian Matle Iranqhe  ,Mbunge wa Jimbo la Arusha Mrisho Gambo wanajali na kuthamini michezo na kuwa nia ni kuona Halmashauri ya Jiji la Arusha inafanya vizuri kwenye michezo  mbali mbali.

Kimsingi alisema Mh.Rais wa Jamhuri ya Muungano wa Tanzania  Dk.John Pombe Magufuli anapenda michezo na anatamani kuona Tanzania inafanya vizuri kwenye michezo kwamba watendaji wa Serikali jukumu lao ni kuhakikisha michezo husika inafanikiwa bila kikwazo. 

Kwa upande wake  Kocha wa Timu ya mpira Arusha (AFC) Elly Kisanga alimshukuru Mkurugenzi wa Jiji la Arusha na kuomba kuendelea kuwasaidia bila kuchoka na kuwaomba wadau wengine wa michezo kuunga jitihada alizoanza Dk.John Pima za kusaidia timu hiyo. 

Kisanga alisema kuwa wako tayari kupokea msaada wowote kutoka kwa wadau ikiwa ni pamoja na chakula na kudai kuwa wakiwezeshwa watafanya vizuri na kuleta heshima ya mchezo wa mpira katika Jiji la Arusha.

Halmashauri ya Jiji la Arusha ni miongoni mwa Halmashauri ambazo zipo katika Mkoa wa Arusha ambao unahimiza michezo na tayari michezo mbali mbali imeanza lengo ikiwa ni kuibua vipaji vya wachezaji na hatimaye kuwapatia ajira kupitia michezo.

PICHANI MKURUGENZI WA HALMASHAURI YA JIJI LA ARUSHA DK. JOHN PIMA NA AFISA MICHEZO JIJI LA ARUSHA NDG. BENSON MANENO WAKIKABIDHI MSAADA WA MIPIRA KWA TIMU YA ARUSHA FOOTBALL CLUB (AFC)