Serikali yaitaka viongozi wa ngazi zote kusimamia utekelezaji wa miradi TASAF kwa weledi

Posted on: October 25th, 2021

Na Mwandishi wetu 

Waziri wa Nchi, Ofisi ya Rais, Menejimenti ya Utumishi wa Umma na Utawala Bora, Mhe. Mohamed Nchengerwa amewataka Viongozi wa ngazi zote kusimamia utekelezaji wa miradi ya TASAF kwa weledi ambapo jumla  ya Miradi 1500 inatarajiwa kutekelezwa katika  awamu ya nne ya Mradi wa kupunguza Umasikini Tanzania TASAF kwa mikoa ya Mwanza, Geita,  Simiyu, Njombe na Arusha.

Nchengerwa ametoa kauli hiyo alipokuwa akifungua Kikao kazi cha kuzindua utekelezaji wa awamu ya nne ya Mradi wa kupunguza Umaskini Tanzania (TPRP IV), Jijini Arusha ambapo alitoa rai kwa viongozi  wa ngazi zote kusimamia  miradi hiyo  kuhakikisha  inatekelezwa kwa thamani halisi. 

Mhe. Nchengerwa amsema kiasi cha shilingi Bilioni 130 katika mikoa hiyo mitano itatolewa kwa lengo la kunyanyua kaya masikini  hivyo amesisitiza utekelezaji wa miradi ufanyike kwa weledi ili fedha hizo zikatumike kwa makundi ya watu waliokusudiwa.

Naye Mkuu wa Mkoa wa Arusha John Mongella amesema Mkoa wa Arusha umepokea kiasi cha shilingi bilion 1.5 kwa kipindi cha mwezi Julai mpaka Oktoba kwa ajili ya kuratibu miradi wa kaya masikini ya  TASAF na kuahidi kutekeleza nakusimamia kikamilifu na kwamba hawatomvumulia yeyote atakayefanya vitendo vya ubadhilifu wa fedha hizo. 

Kwa upande wake Mbunge wa Arusha Mjini Mhe. Mrisho Gambo amesema uzinduzi wa awamu ya nne kufanyika mkoa wa Arusha ni fursa kwa watu na kaya maskini kwani kutasaidia kupunguza makali na hali duni za maisha ya wananchi. 

Jumla ya Halmashauri 33 kutoka Mikoa  mitano itanufaika na mradi wa awamu ya nne  wa kupunguza umaskini Tanzania TASAF.