Uhamasishaji wa kampeni ya Talii Kaskazini kwa wanafunzi wa Jiji la Arusha

Posted on: September 4th, 2019

Katika utekelezaji wa mkakati wa kutangaza utalii wa ndani Kanda ya Kaskazini leo tarehe 04/09/2019 Halmashauri ya  Jiji la Arusha imeendeleza kampeni ya Talii Kaskazini kwa kushirikisha wanafunzi wa shule ya msingi Arusha School  ambapo walitembelea Makumbusho ya elimu ya viumbe, Themi Living Garden, Mnara wa Saa (clock tower) na makao makuu ya Jiji la Arusha ambapo walijifunza historia ya Jiji na vivutio vya utalii vilivyopo Jiji la Arusha.

Kampeni  ya Talii Kaskazini ina lengo la kuhamasisha utalii wa ndani na  inajumuisha mikoa ya Kilimanjaro, Arusha, Tanga na Manyara.

Kwa mujibu wa Afisa Utalii Jiji la Arusha Michael Ndaisaba ameeleza kuwa kampeni hiyo imeanzia katika Jiji la Arusha kwa kuhamasisha wanafunzi kwani licha ya kuwa ni sehemu ya mafunzo bali pia ni wadau wakubwa wa kuhamasisha utalii wa ndani katika jamii.

Ndaisaba amesema kuwa kampeni ya Talii Kaskazini inalenga kukuza mahusiano ya taasisi zinazohusika na utalii na zitakazoshiriki kutekeleza mkakati huo wa kutangaza utalii wa ndani kanda ya Kaskazini, kukuza uelewa wa vivutio vya utalii kwa wakazi wa kanda ya Kaskazini kwa kuwekeza kwenye utalii wenye gharama nafuu na kwenye maeneo ambayo ni rahisi kufikika, kukuza utamaduni wa kupenda utalii kwa vijana hasa wanafunzi na kuongeza idadi ya watalii wa ndani kufikia 2,000,000  ifikapo mwaka 2021.

Kampeni ya Talii Kaskazini inashirikisha wadau mbali mbali wa masuala ya utalii nchini wakiwemo   Tanzania Tourist Board (TTB), Hifadhi za Taifa Tanzania (TANAPA), Mamlaka ya wasimamizi wanyamapori (TAWA) na wengineo.

Walengwa wa mkakati huu ni wakazi wa Kaskazini mwa Tanzania wakiwemo wanafunzi wa shule za msingi, sekondari na vyuo, waajiriwa kwenye taasisi mbalimbali za kiserikali na zisizo za kiserikali, taasisi za kifedha, wafanyabiashara, vikundi mbalimbali vya jamii na wananchi wa kawaida.

“HII NI TANZANIA ISIYOSAHAULIKA; UTALII WA NDANI UNAANZA NA WEWE, TWENDE TUKATALII”

Wanafunzi wa shule ya msingi Arusha School wakipatiwa historia ya Jiji  na kujifunza vivutio vya utalii vilivyopo Jiji la Arusha