WATENDAJI KATA NA WATAALAM WA AFYA WATAKIWA KUSAIDIA HUDUMA YA AFYA

Posted on: March 12th, 2021

Watendaji kata na Wataalam wa Afya watakiwa kusaidia huduma ya afya 

Na Mwandishi wetu

Watendaji kata katika Halmashauri ya Jiji la Arusha watakiwa kushirikiana na wataalm wa afya katika kuhakikisha wananchi wa kata zao wanapata huduma stahiki pamoja na  kuendelea kuwa wawajibikaji kwa kufanya kazi zao kwa uadilifu na kufuata  dhana ya ushirikishwaji  hatimaye  kutoa huduma ya  Afya yenye ufanisi.

Akizungumza na Watendaji kata  wakati akizindua kampeni ya Nisaidie niishi mimi na mama yangu   Kaimu Mkurugenzi Bi. Namnyaki  Laitetei alisema  kuwa  huduma ya afya inahitaji ushirikiano baina ya watendaji na wataalamu wa afya kwa kuwa afya bora ni msingi wa maendeleo ya jamii yeyote Duniani.

Bi. Laitetei  alisema  kuwa huduma bora ya afya ni matokeo ya maendeleo katika jamii yeyote na kwamba huduma bora itafikiwa kwa ushirikiano wa wadau wa afya watendaji wa kata wakiwa ni miongoni mwao.

“Mnapaswa mfanye kazi zenu kwa kutekeleza na kufuata misingi ya Utawala bora kwa kufanya ushirikishwaji wa wadau mbalimbali ili kuendelea kutoa huduma zenye ufanisi” alisema  Laitetei

Kwa upande wake Mganga Mkuu wa Halmashauri ya Jiji la Arusha Dk. Kheri Kagya alisema kuwa huduma za afya katika Jiji la Arusha zinafanywa kwa weledi mkubwa na kuwataka kuendelea kusaidia upatikanaji wa huduma hiyo kwa wananchi ikiwa ni kuunga mkono jitihada za Mh.Rais Dk.John Pombe Magufuli kwa kuhudumia wananchi kwa moyo bila kuchoka .

‘’Hatutaki na hatuwezi kukubali  kile wanachotuletea Serikali kipotee, ni muhimu sote tuendelee kuwa wasimamizi wazuri wa vitendea kazi na vifaa tiba ili vitumike kwa malengo yaliyokusudiwa” alisema Dk.Kagya.

Dk.Kagya alisema matarajio ya serikali nikuona wananchi wanapata huduma bora na katika kufikia mafanikio hayo kila mtu hususani wataalm wa afya na watendaji wa kata wanajukumu lakusaidia kufikia nia njema.

Halmashauri ya Jiji la Arusha ni miongoni mwa Halmashauri zinazofanya vizuri katika huduma ya afya  hapa nchini.

Picha za  matukio kikao cha Wataalm wa Afya na Watendaji wa Kata  wakati wa kikao cha kujadili maendeleo ya afya na mtoto.