Wazazi na walezi waaswa kutoa ushirikiano kwa walimu ili kuinua ufaulu kwa wanafunzi

Posted on: October 20th, 2018

Katika kuelekea mitihani ya kidato cha Nne Afisa Elimu Sekondari Jiji la Arusha Bw. Valentine Makuka amewaasa wazazi na walezi kutoa ushirikiano kwa walimu ili kuinua ufaulu kwa wananfunzi  

Bw. Makuka ambaye ndie alikuwa mgeni rasmi mahafali ya kidato cha nne katika shule ya sekondari Moshono iliyopo Jijini Arusha ametoa rai hiyo  wakati alipokuwa akizungumza na wazazi, wanafunzi pamoja na waalimu wa shule  hiyo wakati wa mahafali hayo yaliyofanyika  hapo jana Tarehe 19 October 2018.  

Bw. Makuka amesema kuwa kuna baadhi ya wazazi na walezi hawatoi ushirikiano wa kutosha kwa walimu katika kufatilia mienendo ya wananfunzi matokeo yake wanawaachia walimu peke yao katika kusimamia malezi ya watoto jambo ambalo limekuwa likichangia kwa asilimia kubwa wanafunzi kufeli kwani wanakosa unagalizi wa pande zote mbili.

 “ Napenda kutoa pongezi kwa wanafunzi wote mnaotarajia kufanya mitihani yenu  ya kidato cha nne kwa hatua kubwa na nzuri mliyofikia kwani wapo baadhi ya  wanafunzi walioshindwa kuendelea na masomo  kwa sababu mbalimbali ikiwemo mimba, makundi mabaya ya mitaani, magonjwa na hata vifo, mzingatie mliyoelekezwa na walimu wenu na hatimaye muweze kufaulu vizuri na kuiletea sifa nzuri shule yetu”. Alisema bw. Makuka

“kwa walimu wote watakaochangia wanafunzi kupata alama ya F katika masomo yao  kwa asilimia zaidi ya 50 katika mitihani, naomba msahau na mjifute katika mikakati ya kupanda vyeo, huo ndio mpango mkakati wa  kuhakikisha wanafunzi wanafaulu na sisi walimu tunawajibika” aliongeza Afisa Elimu huyo

Pia ameongeza kwa kusema kuwa walimu kwa kushirikiana na vyombo vya habari  kuna mkakati wa kuazisha kampeni maalumu ya kuongeza uwezo wa matumizi ya lugha ya kingereza kwa kuendesha midahalo kwa wanafunzi wa shule zote za serikali zilizopo Jiji Arusha.

Sherehe za mahafali ya kidato cha nne hufanyika kila mwaka katika viwanja vya shule hiyo ya Moshono na  kwa mwaka huu wa 2018 idadi ya wahitimu ni wanafunzi 75.